واليوم موضوعي صغير .. عن ظاهرة اتبط جبدي .. شماعة الفشل .. عن فئه كل ما صابتهم مصيبه .. وفشلوا بحياتهم .. وارتكبوا غلط .. ارفعوا ايدينهم وقالوا احنا مساكين .. والزمن قاسي علينا وكل شي ضدنا وحتى الله مو موفقنا ..
ماكو احد فينا حياته كامله .. اكيد كل انسان يعاني بحياته سواء من مشاكل عائلية .. او مشاكل صحية .. او حتى نفسية .. وفية الي يخلقون المشاكل لأنفسهم اما بخطوات غير محسوبه منهم .. وقرارات طائشة .. او تصرفات وردات فعل بغير محلها .. وفي الي يفهم ان هذا قضاء الله وقدره وهذا المكتوب له .. ويصبر على كل شي وتكون عنده القناعه انه يكون افضل من جذي ويحاول يعدل من نفسه ومن حياته ويرتقي اكثر .. ويصحح اخطاءه ويحاول ما يكررها .. بس الاكثريه منا فقدوا هالاحساس وهالقناعه الي اهي صادره بالأساس من الايمان بالله والصبر , والطموح انك تكون انسان أفضل .. ( ومو بس تكون افضل واتمثل المثاليه جدام الناس .. بل اتحس بطعم هالشي انك انسان مميز بينك وبين نفسك ) .. وصار الكل يلوم الزمن فتلاحظ من كلامهم وتدمرهم الدايم او حتى من تصرفاتهم هالشي .. لو تصادفهم ابسط مشكله وعرقله بحياتهم يجزعون و يبدون يلومون الزمن ويتحلطمون .. ولا احد فيهم يحاول يفكر ويراجع نفسه ويعرف الغلط من وين بدى وليش صار هالشي .. لأن بتفكيرهم ان هالشي صار وانتهى .. وماكو حل له .. فليش اتعب نفسي بالتكفير .. اصلن الغلط مو مني من الزمن .. مسكره بويهي .. حظي ماايل .. الله مو موفقني .. انا منحوس .. الخ
ومن اهني تبدي اللامبالاة .. وعدم محاسبة النفس والطيش .. ماكو وعي ولا تفكير ولا درايه بحجم المشكله واسبابها ونتايجها .. فيصبح الانسان فارغ .. سخيف وتافه .. والاكبر عمره ما يتعلم
مو غلط ولا عيب الواحد يغلط فينا .. اكيد ماكو انسان كامل خاصة بزمنا هذا .. بس الغلط انك تستمر بالغلط .. وما تعترف لنفسك انك غلطت .. المفروض حتى لو طاح الفاس بالراس اقل شي مستقبلا ما يتكرر نفس الغلط ..واذا تكرر يكون انسان ما يتعلم واهني المصيبه طبعا .. بيكون مثل الحمار وانتم بكرامه الي يحمل اسفارا وأهو مو مستفيد منها ولا يعرف محتواها شنو .. بس يتعب ويشقى على الفاضي
فنصيحة الي كل من يعلق على شماعة الفشل اخطاءه والمشاكل الي تصير له .. ويلوم الزمن .. وبعضهم يكفرون ويقولون كلام مو عارفين حجمه .. لو فكرت عدل وحسبت خطواتك جان ما طحت بمشاكل .. وعانيت منها .. وحتى لمى تفشل وتواجهك مصاعب تقدر بمرحله معينه توقف الي قاعد تمر فيه وتكون افضل بمحاسبة نفسك .. بتهذيبها .. والصبر ..
( صبر جميل والله المستعان )
ومثل ما قال الإمام الشافعي..
نعيب زماننا والعيب فينا ** ومال زماننا عيب سوانا
ونهجو ذا الزمان بغير ذنب ** ولو نطق الزمان لنا هجانا
5/oct/2008
-----------------------------